Igihombo, inyungu n'inkurikizi ziba ku bahanzi batoroka u Rwanda

Kuva mu mwaka wa 2010 bamwe mu bahanzi, abatunganya umuziki n’abandi bafite aho bahuriye na muzika bagiye batoroka u Rwanda ku mpamvu zitazwi. Benshi muri aba bahanzi bakunze gutoroka u Rwanda iyo baramutse boherejwe mu butumwa hanze y’igihugu.Ikibazo cyo gutotoka kw’abahanzi nyarwanda cyongerewe uburemere igihe abahanzi bane bari bajyanye na Mani Martin kwitabira amarushanwa ya Jeux de la Francophonie ubwo Minisiteri ifite Umuziki mu nshingano zayo yatangaje ko kuba aba bahanzi bane barafashe umwanzuro wo gutoroka  bagiye kubifatira ibyemezo bihamye kuburyo abahanzi bakiri bato batazajya bapfa kubona amahirwe yo guserukira u Rwanda mu mahango dore ko abatoroka akenshi usanga ari abahanzi bakiri bato.

Ku ikubitiro mu mwaka wa 2010 abahanzi nyarwanda,  The Ben na Meddy bari boherejwe mu butumwa bw’igihugu muri Amerika bagezeyo bafata umwanzuro wo kwigumirayo. Benshi mu bafana b’aba bahanzi byarabababaje cyane ndetse n’igihugu kirababara dore ko aba bahanzi bari bahagaze neza muri muzika icyo gihe mu Rwanda.
Nyuma y’aba bhanzi bamaze kujya hanze, hari abandi bahanzi n’abaproducers bagiye bajya hanze y’u Rwanda gahoro gahoro ntibagaruke, byose bigasiga abantu mu rujijo.
Igihombo aba bahanzi bahura nacyo iyo batorotse
Icya mbere ni uko aba bahanzi baba bagiye kure y’abafana babo kandi ni nabo ahanini batuma aba bahanzi bakora bakanabatera ingabo mu bitugu. Uretse kuba bajya kure y’abafana babo hari imiryango, inshuti n’abantu baba babakunda bababura ndetse urukundo bari babafitiye ugasanga rugenda rubaganuka gahoro gahoro.
Burya abafana iyo bakunze umuhanzi igihe kirekire batamubona amaherezo igihe kiragera bakwibagirwa bakikundira abandi bahanzi babona bugufi yabo, abo bakunda kubona mu bitaramo….
Ikindi gihombo gikomeye ni uko umuziki w’aba bahanzi cyangwa iterambere baba bagezeho muri muzika riragabanuka cyane. Uburyo bwo guhimba burahinduka, imitekerereze ndetse n’uburyo indirimbo z’umuhanzi zigera ku bafana be buba bugoranye ugereranyije n’uko biba bimeze ari mu gihugu.
Inyungu bahura nazo iyo bamaze gutoroka
N’ubwo aba bahanzi baba bavuye mu gihugu mu buryo butemewe bagahitamo kujya kwibera hanze y’u Rwanda , iyo bageze hanze imitekerereze yabo, imihimbire n’ubuhanga bwabo muri muzika iyo babikoresheje neza bafite icyerekezo bagera kuri byinshi.
Aba bahanzi bajya hanze y’u Rwanda ntibagaruke mu rwababyaye, iyo bakora muzika yabo hanze usanga bigereranya n’ibyamamare basanze muri ibyo bihugu bagakorana ingufu bashaka kugera ku rwego rwabo. N’ubwo biba bigoranye cyane kuzagera kure muri muzika waravuye mu gihugu cyawe muri ubwo buryo hari ubumenyi bwisumbuyeho uyu muhanzi aba afite muri muzika kurusha abandi bose aba yarasize mu Rwanda.
N’ubwo hari inyungu babona mu buhanzi iyo bageze hanze y’u Rwanda si nini cyane ndetse n’iyo baramuka bagumye mu gihugu bagakoresha impano yabo neza babishyizeho umwete izo nyungu zose bazibona kandi mu buryo bwiza batabanje gutoroka igihugu.
Inkurikizi zibamo iyo bamaze gutoroka
Iyo umuhanzi amaze gufata umwanzuro wo kuguma mu mahanga ahura n’ikibazo gikomeye cyo gushakisha ubwenegihugu bw’igihugu aba abarizwamo ndetse muri bimwe mu bihugu byo ku isi biba ari ikibazo gikomeye kugira ngo umuntu w’umunyamahanga azabashe kwemererwa ubwenegihugu.
Igihugu umuhanzi yavuyemo nacyo kandi usanga gifite ikibazo gikomeye ku muturage wacyo wafashe umwanzuro wo kutagaruka mu gihugu ntakibazo na kimwe yahuye nacyo, haba inzara, umutekano, cyangwa ibindi bibazo byatuma afata umwanzuro wo kutagaruka mu gihugu.
Indi nkurikizi nziza ibamo ni uko bamwe mu bahanzi hari igihe babona amahirwe yo kuzamuka iyo hagize undi muhanzi wari ufite ingufu uva mu gihugu bityo ugasanga kuba bamwe bagiye hari abandi babyungukiramo bakagura impano zabo ndetse bakanigarurira umubare w’abafana benshi.
Mu cyumweru gishize Minisiteri yari yatangaje ko abahanzi bakiri bato ari nabo bakunda gutoroka iyo boherejwe mu mahanga ko bitazapfa kongera kuborohera kuba bahabwa amahirwe yo guserukira u Rwanda ariko ntabwo waba ari umwanzuro nyawo nk’uko Alain Muku yaraye abitangarije Sunday Night. Minisiteri yakagombye gukora iyo bwabaga igakemura iki kibazo mu nzira nziza ntihazagire umuhanzi wongera kujya mu butumwa ngo aguma i mahanga gusa na none abahanzi nyarwanda bafata umwanzuro wowo kutagaruka iyo basohotse igihugu baba bahesheje isura mbi igihugu, baba bihemukiye ndetse bagahemukira abahanzi bagenzi baba kuko uyu muco ukomeje  bimwe mu bihugu ntibyazongera gutumira u Rwanda mu marushanwa mpuzamahanga.